Bloomberg سايتى نۇرسۇلتان نازارباەۆ پرەزيدەنتتىك وكىلەتتىگىن تاپسىرۋى ورتالىق ازياداعى الپاۋىت مەملەكەتتەگى ۇزاق مەرزىمدى بيلىك اۋىسۋىنىڭ باستاماسىن كورسەتەدى دەپ ەسەپتەيدى.
«مەن قازاقستان رەسپۋبليكاسىنىڭ پرەزيدەنتى رەتىندەگى وكىلەتتىگىمدى توقتاتۋ جونىندە شەشىم قابىلدادىم. بۇل – وڭاي شەشىم ەمەس» دەدى نازارباەۆ سەيسەنبى كۇنى حالىققا ۇندەۋىندە. ن.نازارباەۆ 2020 جىلعى سايلاۋعا دەيىن پرەزيدەنتتىك وكىلەتتىكتىڭ سەنات توراعاسى قىزمەتىن اتقارعان قاسىم-جومارت توقاەۆقا جۇكتەلەتىنىن مالىمدەدى. سونىمەن قاتار قاۋىپسىزدىك كەڭەستىڭ توراعاسى, «نۇر وتان» پارتياسىنىڭ توراعاسى جانە كونستيتۋتسيالىق كەڭەستىڭ مۇشەسى لاۋازىمىندا قالا بەرەتىنىن ايتتى. «وزدەرىڭىزبەن بىرگە بولامىن. ەلىمىزدىڭ, حالقىمىزدىڭ قامى – مەنىڭ مۇددەم بولىپ قالا بەرەدى», دەدى ن.نازارباەۆ» دەيدى Bloomberg.
بۇدان كەيىن Bloomberg سايتى بىرقاتار ساراپشىلاردىڭ ەلدەگى بيلىكتىڭ اۋىسۋى تۋرالى پىكىرىن كەلتىرگەن.
«توقاەۆ قازىرگى ەل تىزگىنىن ۇستاعاندار اراسىنداعى ىقپالدى تۇلعا, سوندىقتان بيلىكتە قالۋى مۇمكىن», دەيدى ورتالىق ازيا جونىندەگى ساراپشى دانيل كيسلوۆ. ول وسى وقيعانى 1999 جىلى رەسەيدەگى بيلىكتىڭ اۋىسۋىن, ياعني بوريس ەلتسيندى ءپۋتيننىڭ الماستىرۋىمەن سالىستىرىپ, «ەشقانداي داعدارىس بولمايدى» دەپ ەسەپتەيدى.
«پرەزيدەنتتىڭ قىزمەتىنەن باس تارتۋى جاڭا كەزەڭنىڭ كەلگەنىن كورسەتەدى. نازارباەۆ ءالى دە ساياسي, ەكونوميكالىق ىقپالىن ساقتاپ, شەشىم قابىلداۋعا اسەر ەتە بەرمەك», دەيدى Prism كومپانياسىنىڭ ساياسي ريسك-مەنەدجمەنت جونىندەگى ساراپشى كەيت ماللينسون.
ال Standard Life Investment Ltd قورىنىڭ قازاقستاندىق ەۋرووبليگاتسيانى باسقارۋشى كيران كەرتيس «ن.نازارباەۆ مۇنى الدەقاشان جوسپارلاپ قويعانى بەلگىلى. بىراق كۇتپەگەن جەردەن مالىمدەمە جاسادى», دەپ ەسەپتەيدى.
«نازارباەۆ ءاردايىم ورتالىق ازيا كوشباسشىلارىنان شوقتىعى بيىك تۇرعان-دى. ەلدەگى مۇناي قورىنىڭ ارقاسىندا ول حالىقارالىق ارەنادا قازاقستان اتىن تانىتا ءبىلدى. نازارباەۆ ساۋدا-ەكونوميكالىق بايلانىسى بار ەلدەرمەن جاقسى قارىم-قاتىناس ساقتاپ قالدى. ءارى اقساقال مەملەكەتتىك قايراتكەر رەتىندە قۇرمەتكە لايىق», دەپ تۇيىندەلگەن Bloomberg-تەگى ماقالا.